Tu itni pyari hai
Ke tu sabse pyari hai
Tujhe aata dekh fiza bhi behne chal parti hai
Pahado ki chotiyo ko chum apni baahon mein bharti hai
Tu wo baarish hai jo boondo ko bhi bheegne ka ehsaas dilati hai
Baansuri se nikle suro ko meetha hone ka ehsaahs karati hai
Teri pyari hasi dekh mein tim-timata hu
Toota hua taara ban tujhmein jag-magata hu
Tujhe chalta dekh mein tere sang chal padta hu
Aage zameen hai ya nahi, kisi soch se nai darta hu
Tere chehre ko dekh suraj subah ki pehli angdaai leta hai
Tere chehre se churaakar hi chand sabko roshni deta hai
Tu wo kahani hai jise mein har raat sunna chahta hu
Tu wo rishta hai jise dil kehta hai - hamesha nibhata rahu
Tu paas hoti hai to udaasi kone mein chup-chaap beth jaati hai
Saari khidkiyan khul jaati hai aur masti dil mein samaati hai
Tujhe chhoone par khud ko apne aur kareeb mehsoos karta hu
Tere liye savarta hu, tujhse nikharta hu…
Teri palkon ke neeche ek jheel mein main aksar utar jaata hu
Apni zindagi ki ek nayi kahani ke panno ko wahi par sajaata hu
Teri aankhein meri aankhon mein kuch aise pighal jaati hai
Jaise suraj har shaam kshitij mein dhal jaata hai
Mujhe daat ti hai, mujhse ladti hai aur mujhe sunaati hai
Par tere gusse mein se bhi ek dheemi khushboo aati hai
Neend mein tujhe apne kareeb mehsoos karta hu
Subah hoti hai, haath mein sirf siraana dekh darta hu
Bhool gaya hoon raat mein sona aur din mein jaagna
Aadat si hogai hai tere saath ki, bhool gaya hu akele bhaagna
Kuch hi palo mein tere sath itna kuch jod lia hai
Tere liye apni tanhaai ko bhi tanha chhod dia hai
Meri khushi teri khushi ke sang rehne lagi hai
Meri zindgi tujhe apna saga kehne lagi hai
Tujhse mil armaan kuch kam se hogaye hain
Apne aap ko bhi nai dikhte, tujhme kuch aise kho gaye hain
Meri muskurahat teri muskurahat ko chahti hai
Meri aankhein tujhe, aur teri aankhein mujhe ye bataati hai
Nakshe to khoob dekhe par khazaana nai dikha
Khush naseeb hu ki tune khud par mera naam likha
Tere andar chupi mujhe apni ek pyari si tasveer nazar aati hai
Teri bhi udi hui neend mere kaano mein aake aksar gungunati hai
Tu hain yaha to tujhme khud ko dhoond leta hu
Tere na hone par to zindagi fir apni talaash mein nikal jaaegi
Kuch lamhe mujhe sataenge, kuch lamhe mujhe rulaenge
Tere jaane ke baad mujhpar hasenge, kabhi mujhe daraenge
Bas dua karta hu ki ye mere kuch shabd tujhe hamesha hasaenge
Mere hone na hone par bhi kuch pal tujhe hamesha yaad aaenge
Nahi chahta ki khou tujhe, nahi krta mun tujhse alag hone ka
Darta hu tere door jaane se, darta hu un sapno ko khone se
Fir bula rahi doosri duniya, aasmaan paar tu naya geet gaegi
Kuch yaadein aur kuch adhoore sapne mere paas chhod jaegi.
Pure din waqt dekhta rehunga
‘Haddi bajke chamdi minute kab bajenge,’ khud se kahunga
Tu itni pyari hai
Ke tu sabse pyari hai
No comments:
Post a Comment